घरमै बस्दै गरेको समयको सदुपयोग गर्दै चर्चित गायिका सरिश्मा अमात्यले नयाँ म्यूजिक भिडियो ‘ढुकढुक गर्ने दिलैमा’ सार्वजनिक गरेकि छिन् । 

हाल अमेरिकाको मेरिल्यान्ड राज्यको बाल्टिमोरमा बस्दै आएकि गायिका अमात्यले आफ्नो घरभित्रैबाट भिडियो बनाइ सार्वजनिक गरेकि हुन् ।

विश्वभरि कोभिड १९ को संक्रमण फैलिरहेको अवस्थामा अमेरिकामा पनि स्टे होम आदेश जारी गरिएको छ । अमेरिकामा लकडाउन नभनी स्टे होम भनिएपनि यो लकडाउन जस्तैको अवस्था हो ।

संक्रमण फैलिन नदिन सबैजना घरमै बसेर भौतिक दुरी कायम राखौं भन्ने सन्देश दिन यो म्यूजिक भिडियो बनाएको अमात्यले भनिन् ।

‘अहिलेको अवस्थामा समाजलाई सुरक्षित र संक्रमणमुक्त बनाउन घरमै बसौं । र घरमा बसेर पनि केही न केही श्रृजनात्मक काम गर्न सकिन्छ भन्ने सन्देश दिन नै यो म्यूजिक भिडियो बनाएकि हुँ’ अमात्यले भनिन् ।

घरभित्र बसेर आफुले जानेका श्रृजनात्मक कामहरु गर्दै समाजलाई पनि मनोरन्जन दिन अमात्यले सबैलाई आग्रह पनि गरिन् ।

गीतको छायाङ्कन गायिका अमात्यकै घरभित्र गरिएको छ । गीतको छायाङ्कनको साथै पोस्ट प्रोडक्सनको सम्पूर्ण काम उनकै घरभित्रबाटै भएको छ ।

छायाङ्कनको लागि श्रृङ्गार त अमात्य आफैले गरिन् । गीतको निर्देशनको साथै क्यामेरा र भिडियो एडिटिङको काम गायक संजीप प्रधानले गरेका छन् । गायक प्रधान सरिश्माका पति हुन् ।

म्यूजिक भिडियोको निर्देशन, क्यामेरा, एडिटिङको अनुभव सोध्दा गायक प्रधानले भने, ‘गाउन नै सजिलो रहेछ, आफुले गर्दै आएको भन्दा फरक क्षेत्रको काम गर्दा अलि गार्हो त भएकै हो तर रमाइलो नि लाग्यो ।’

करीब १५ वर्ष अघि नै रिलिज भएको सरिश्माको एल्बम मधुरीमा २ को यो गीतमा संगीत चर्चित संगीकार अनिल शाहीको रहेको छ भने रचना जनक दिप पराजुलीको रहेको छ ।

LEAVE A REPLY

Please enter your comment!
Please enter your name here